ინგლისური ტაბლოიდები აქტიურად განიხილავენ "მანჩესტერ სიტიში" რობერტო მანჩინის გათავკაცების საკითხს, რომელმაც გუშინ "ქალაქელთა" დამრიგებლის რანგში პირველი პრესკონფერენცია გამართა. The Sun-ი მტკიცებით, მანჩესტერელებსა და იტალიელ სპეციალისტს შორის შეთანხმება ორი კვირის წინ იქნა მიღწეული. ხელშეკრულების გაფორმებამდე, მანჩინიმ კლუბის ხელმძღვანელობისგან იმის გარანტია მოითხოვა, რომ იანვრის სატრანსფერო პერიოდში ახალ ფეხბურთელთა შესაძენად აუცილებლად გამოიყოფოდა სოლიდური თანხა, რაზეც აპენინელმა "სიტის" არაბი მფლობელისგან თანხმობა მიიღო.
მოკლედ, ინგლისში ყველა დარწმუნებულია, რომ მანჩინი მანჩესტერული გუნდის თავის ჭკუაზე გადაწყობას ეცდება. The Sun-ის ინფორმაციით, მოთამაშეთა შეძენის პარალელურად, იტალიელი მისთვის გამოუსადეგარ ფეხბურთელებსაც გამოემშვიდობება. პოტენციურ წამსვლელთა შორის, პირველ რიგში ჟულიენ ლესკოტი და უეინ ბრიჯი სახელდებიან. სხვათა შორის, ვიდრე ლესკოტი "სიტიში" გადაბარგდებოდა, მიმდინარე სეზონში მან რამდენიმე თამაში "ევერტონის" შემადგენლობაშიც ჩაატარა (აგვისტოში). ასე რომ, თუკი მას მანჩესტერიდან მართლაც გაუშვებენ, ფიფას კანონების მიხედვით, იგი სხვა გუნდში თამაშს ახალი სეზონის დაწყებამდე ვეღარ შეძლებს.
მანჩინის ყველაზე დიდ სატრანსფერო ოცნებას "იუვენტუსის" 25 წლის მცველის, ჯორჯო კიელინის შეძენა წარმოადგენს. რობერტოს აზრით, იგი კოლო ტურეს იდეალური მეწყვილე იქნება.
იტალიურ ბაზარზე 45 წლის სპეციალისტის სურვილები ამით არ ამოიწურება. მანჩინი თავისი ყოფილი კლუბიდან ორი მცველის გადაბირებას აპირებს - დუგლას მაიკონისა და ივან კორდობასი. მაიკონის შეძენის შემთხვევაში, "სიტის" ძირითადს დაემშვიდობება ამავე კლუბის აღზრდილი მიკა რიჩარდსი, ხოლო არგენტინელი პაბლო საბალეტას სასტარტოში მოხვედრის ისედაც მიზერული შანსი სულაც განულდება.
ცნობისთვის, ბრაზილიელი უკანახაზელი ბოლო პერიოდში ხშირად გამოთქვამს უკმაყოფილებას ანაზღაურების გამო. იგი თვლის, რომ საკუთარი კლასითა და შრომით გაცილებით დიდ ხელფასს იმსახურებს, ვიდრე აქვს. "სიტის" კი, თავისი არაბი მფლობელის მილიონებით, აშკარად შეუძლია მაიკონის სურვილის დაკმაყოფილება. ამდენად, მისი "გაქალაქელება" სრულიად შესაძლებელია. რაც შეეხება კოლუმბიელ კორდობას, იგი "ინტერის" ღირსებას 1999 წლიდან იცავს და ნაკლებადსავარაუდოა, მისი დატოვება მოისურვოს.
მანჩინის მილანური კლუბიდან კიდევ ერთი ფეხბურთელის, მარიო ბალოტელის წაყვანაც სურს, მაგრამ ამგვარი ხმების გავრცელებისთანავე, მასიმო მორატის კომენტარმაც არ დააყოვნა.
"სიტის" ხელმძღვანელები ოცნებაშიც ნუ დაუშვებენ, რომ ჩვენ მარიოს შეველევით. ბალოტელი მალე ჩვენი სიმბოლო გახდება. ნორმალურად მოაზროვნე პრეზიდენტები ასეთ ფეხბურთელებს არ ყიდიან", - კატეგორიული იყო მორატის პასუხი.
მოკლედ, იანვარში მანჩინის "იაფი" და იოლი ბაზარი არ ელის, მაგრამ იგი "სიტის" მილიონებით მაინც ეცდება მისთვის სასურველი ფეხბურთელების შეძენას.

FC.INTERNAZIONALE