FC.INTERNAZIONALE              

ამ გუნდებს შორის "სან სიროზე" გამართულ წინა სამივე შეხვედრაში შედეგიანი ფრე დაფიქსირდა. გულშემატკივარი მათგან გოლებს კვირასაც ელოდა და ფეხბურთელებმაც ისე მოინდომეს, რომ შეიძლება ითქვას, გეგმა გადაჭარბებით შეასრულეს.
შეხვედრის დებიუტში, ანგარიში სნეიდერმა საჯარიმოს წინა ხაზიდან გატანილი ეფექტური გოლით გახსნა. წონასწორობა მალევე აღდგა - მე-13 წუთზე, "რომას" ბრაზილიელმა ნახევარმცველმა, სიმპლისიომ კასეტის ჩაწოდებით ისარგებლა და თანამემამულე ჟულიო სეზარს ახლო მანძილიდან გაუტანა - 1:1. შემდეგ კი მეკარეების ჯერი დადგა. განსაკუთრებით ბევრი სამუშაო "ინტერის" კიპერს ჰქონდა, რომელმაც ბორიელოსა და ვუჩინიჩის ურთულესი დარტყმები მოიგერია, ხოლო ჟულიო სერჟიომ სნეიდერს არ მისცა დუბლის გაფორმების საშუალება.
სამართლიანობა მოითხოვს აღინიშნოს, რომ ამ მონაკვეთში რომაელები უფრო აქტიურად და მრავალფეროვნად მოქმედებდნენ, მაგრამ 35-ე წუთზე, სწორედ ისინი აღმოჩნდნენ მდევრის როლში - "ინტერის" საუკეთესო ბომბარდირი, სამუელ ეტოო საჯარიმოში 3 მცველის გარემოცვაში აღმოჩნდა, მაგრამ კამერუნელმა ერთი ცრუმოძრაობით ბურთს კარისკენ გზა გაუთავისუფლა და ოსტატური დარტყმით "რომას" კიპერი უსაქმოდ დატოვა - 2:1.
გუნდებმა მეორე ნახევარიც აქტიურად დაიწყეს. 62-ე წუთზე კი, შეიქმნა ეპიზოდი, რომელმაც მატჩის მსვლელობაზე მნიშვნელოვანი ზეგავლენა იქონია. ნიკოლას ბურდისომ საკუთარ საჯარიმოში ჯამპაოლო პაცინი წააქცია, რისთვისაც მსაჯისგან ორმაგი სასჯელი მიიღო - პენალტი და წითელი ბარათი. თერთმეტმეტრიანი ზუსტად ეტოომ შეასრულა და მიმდინარე ჩემპიონატში გატანილი გოლების რაოდენობა 15-მდე გაზარდა. სულ მალე "რომას" კარში მეოთხე გოლიც გავიდა - ამჯერად, ბრაზილიური წარმოშობის ტიაგო მოტამ იხეირა, რომელიც იტალიის ნაკრების თავკაცმა, ჩეზარე პრანდელიმ გერმანიასთან ამხანაგური მატჩისთვის "სკუადრა აძურაში" პირველად გამოიძახა.
თითქოს უკვე ყველაფერი გადაწყვეტილი იყო, მაგრამ რიცხობრივ უმცირესობაში დარჩენილმა სტუმრებმა იმდენი მოახერხეს, რომ მირკო ვუჩინიჩისა და სიმონე ლორიას გოლებით, ჩამორჩენა მინიმუმამდე შეამცირეს - 4:3. მატჩში ინტრიგა 9 წუთით შენარჩუნდა. შემდეგ კი, თავისი გოლი ესტებან კამბიასომაც გაიტანა და შეხვედრის საბოლოო ანგარიში დააფიქსირა - 5:3.

"ინტერმა" ბოლო 8 თამაშიდან 7-ის მოგება შეძლო, რისი წყალობითაც "მილანთან" ჩამორჩენა ხუთ ქულამდე შეამცირა. მომავალ ოთხშაბათს, "ფიორენტინასთან" გადადებული მატჩის მოგებაც თუ შეძლო, ჩემპიონატში მდგომარეობა უკიდურესად დაიძაბება. ვფირქობთ, რომ წელს "კალჩოში" საინტერესო ბრძოლა გველის.

ვიდეო

მილანი: სან სირო, 60000
ინტერი 5:3(2:1) რომა

ინტერი: ჟულიო სეზარი, კორდობა, რანოკია, ხავიერ ძანეტი, მაიკონი, ტიაგო მოტა, კამბიასო, ხარჯა, სნეიდერი (ნაგატომო 75), ეტოო, პაცინი (მილიტო 70).
მწვრთნელი: ლეონარდო.

რომა: ჟულიო სერჟიო, ნიკოლას ბურდისო, ჟუანი, რიისე, კასეტი, დე როსი, პეროტა (როდრიგო ტადეი 67), სიმპლისიო (გრეკო 71), მენეზი (ლორია 64), ვუჩინიჩი, ბორიელო.
მწვრთნელი: კლაუდიო რანიერი.

გოლები: 1:0 სნეიდერი (3), 1:1 სიმპლისიო (13), 2:1 ეტოო (35), 3:1 ეტოო (63, პენ), 4:1 ტიაგო მოტა (71), 4:2 ვუჩინიჩი (75), 4:3 ლორია (81), 5:3 კამბიასო (90).

გაფრთხილება: ხარჯა (37) - ბორიელო (43), დე როსი (88).
გაძევება: ნიკოლას ბურდისო (62).
მსაჯი: პაოლო ტალიავენტო.
დარტყმა 24 (14)-23 (8); ჯარიმა 11-12; კუთხური 4-1; თამაშგარე 4-1; ბურთის ფლობა 50%-50%; სეივი 5-9.