მილანის ინტერის ცოცხალმა ლეგენდამ ხავიერ ძანეტიმ განაცხადა, რომ ბოლო დროინდელი წარუმატებლობების მიუხედავად, მისი გუნდი არ აპირებს დანებებას.

წლევანდელი სეზონი "ნერიაძურისთვის" სირთულეებით სავსეა, თუმცა კლაუდიო რანიერის მოსვლის შემდეგ მილანელებმა იპოვეს თავიანთი თამაში და კალჩოს ფსკერიდან მოწინავე ადგილებამდე შეძლეს მოსვლა.

ახლა ჩავარდნამ კვლავ იჩინა თავი, ინტერმა სერია ა-ს ბოლო 3 მატჩიდან ვერცერთის მოგება მოახერხა.

რომასთან უკანასკნელი მატჩი კი ნამდვილი ჯოჯოხეთი გამოდგა რანიერის შეგირდებისთვის.

ნერიაძურის ყველა აკრიტიკებს, თუმცა მისი უბერებელი კაპიტანი კვლავ ცდილობს ყველაფერს ახსნა მოუძებნოს და დაიცვას საყვარელი კლუბი:

ჩვენ არ ვნებდებით და კვლავ ვაგრძელებთ ბრძოლას. ჯერ არაფერია დასრულებული ან გადაწყვეტილი.

იმ საყვედურმა, რომელმაც ჩვენი მისამართით გაიჟღერა სავსებით დამსახურებული იყო. სულ ცოტა ხნის წინ ჩვენი ტიფოზები წარმატებებსა და გამარჯვებებს იყვნენ მიჩვეულნი, ახლა კი იმედგაცრუებულნი არიან.

"მინდა კიდევ ერთხელ განვაცხადო, რომ ჯერ არაფერია გადაწყვეტილი. სეზონის ბოლომდე დიდი დროა დარჩენილი და ჩვენ ყველაფერს გავაკეთებთ წარმატებისთვის. ახლა მთავარია სიმტკიცისა და ხასიათის გამოვლენა."-განაცხადა არგენტინელმა Sky Sport 24-თან საუბარში.

FC.INTERNAZIONALE