ფლამენგოს ფორვარდმა ადრიანომ, რომელიც 2009 წლის ბრაზილიის ჩემპიონატის საუკეთესო ფეხბურთელი და ბომბარდირი გახდა, კლუბთან კონტრაქტი ნახევარი წლით გაახანგრძლივა. ამის შესახებ იტალიური გამოცემა La Gazzetta dello Sport-ი ბრაზილიური კლუბის ვიცე-პრეზიდენტის, მარკოს ბრაზის სიტყვებზე დაყრდნობით იუწყება. ადრიანომ მიმდინარე წლის აპრილში მილანის ინტერი თვითნებურად დატოვა და ბრაზილიაში დაბრუნდა, სადაც ფლამენგოს მიაშურა. ბრაზილიურმა კლუბმა მისი სატრანსფერო უფლებები გამოისყიდა. მას შემდეგ, 27 წლის თავდამსხმელმა რიო დე ჟანეიროელთა მაისურით 30 შეხვედრაში 19 გოლი გაიტანა და გუნდის გაჩემპიონებაში დიდი წვლილი დაიდო. ბოლო პერიოდში ევროპული სპორტული მედია იუწყებოდა, რომ ადრიანოს ბებერ კონტინენტზე დაბრუნება სურდა, მაგრამ ფლამენგოსთან კონტრაქტის გახანგრძლივებით ფეხბურთელმა აღნიშნულ ხმებს წერტილი დაუსვა.
|