კენჭისყრის შემდეგვე ცხადი გახდა, რომ ეს ჯგუფი უნიკალური იქნებოდა. ჯგუფში, რომლის ოთხივე მონაწილეც თავისი ქვეყნის ჩემპიონი და მიმდინარე გათამაშების ლიდერი ასპარეზობს, ინტერესი არც გასულ ტურებში დაუკარგავს და ერთადერთია, რომელშიც 5 ტურის შემდეგაც ყველა გუნდს აქვს როგორც შემდეგ ეტაპზე გასვლის, ასევე ჯგუფში ჩარჩენის შანსი.
ძნელია ჯგუფის ცენტრალური შეხვედრის გამორჩევა, მაგრამ ის ალბათ მაინც მილანში გაიმართება. ინტერის და რუბინის წყვილში გამარჯვებული გუნდი შეინარჩუნებს გაპირველების შანსს, ხოლო თუ მატჩი ფრედ დასრულდა, მაშინ შესაძლოა ორივე ეს გუნდი გამოეთიშოს ასპარეზობას. თუ მატჩი ამ გუნდებს შორის გამართული წინა დაპირისპირების მსგავსად 1:1 დასრულდა, მაშინ უკეთეს პოზიციაში ინტერი აღმოჩნდება, რადგან მას ჯგუფის ყველა მატჩი ერთად -რუბინზე მეტი გოლი ექნება გატანილი. მილანელებს აძლევთ ხელს უგოლო ფრეც, აი სხვა საყაიმო შედეგის შემთხვევაში კი იტალიის ჩემპიონს რუსეთის საუკეთესო გუნდი დაჯაბნის. თუ ეს მატჩი მართლაც ფრედ დასრულდა, ხოლო ჯგუფის მეორე შეხვედრაში დინამომ იმარჯვა, მაშინ ინტერიც და რუბინიც გამოემშვიდობებიან ჩემპიონთა ლიგას.
-ინტერმა რუსულ კლუბებს აქამდე გამართულ 13 მატჩიდან 8 მოუგო, 4 ფრედ ეთამაშა და ერთხელ თავად განიცადა მარცხი. საკუთარ მოედანზე კი მილანელებმა 5 შეხვედრა მოიგეს და 1 დათმეს. რუბინმა იტალიის წარმომადგენლებთან ჩატარებულ 3 მატჩში ერთადერთხელ მოახერხა ფრის თამაში, ისიც საკუთარ მოედანზე.
თუ დღეს მასპინძლებმა სტუმრების კარის აღება მოახერხეს, მაშინ ჩემპიონთა თასზე 100, ხოლო ევროტურნირებზე 450 გოლს მოუყრიან თავს.
მართალია, იტალიის ჩემპიონატის ბოლო ტურში "ინტერი” დამარცხდა, მაგრამ მილანელები გათამაშებას მაინც დამაჯერებლად ლიდერობენ. რაც შეეხება რუბინს, მან უკვე დასრულებულ რუსეთის ჩემპიონატში პირველი ადგილი დაიკავა და ზედიზედ მეორედ გაჩემპიონდა.
ინტერს ტრავმების გამო სანტონი და კუარეშმა, ხოლო დისკვალიფიკაციის გამო კივუ დააკლდება. რუბინის დანაკლისს კი ტრავმირებული შარონოვი და ბუხაროვი შეადგენენ.

FC.INTERNAZIONALE