ბარსელონას შვედი ნახევარმცველი ზლატან იბრაჰიმოვიჩი სანაკრებო კარიერას წყვეტს, ყოველ შემთხვევაში, დროებით მაინც. სკანდინავები მომავალი მუნდიალის ფინალისტთა შორის ვერ მოხვდნენ, ზლატანს კი, საკუთარი ენერგიის მხოლოდ ამხანაგურ მატჩებში ხარჯვა არ სურს. ამის შესახებ ფეხბურთელმა Sky Sports-თან საუბრისას განაცხადა. "ჩემთვის ყოველთვის დიდი პატივი იყო საკუთარი ქვეყნის ღირსების დაცვა. თუმცა, ამ ეტაპზე იძულებული ვარ, სანაკრებო კარიერაზე დროებით უარი ვთქვა. მიზეზი მოტივაციის ნაკლებობაა. ჩვენ მსოფლიოს ჩემპიონატის საგზური ვერ მოვიპოვეთ. ამიტომ, უახლოეს მომავალში მხოლოდ უმნიშვნელო ამხანაგური შეხვედრები გველის. ამგვარი მატჩებისთვის სათანადოდ განწყობა კი, აშკარად მიჭირს. სამაგიეროდ, ბარსელონას წინ ისეთი რთული სეზონი ელის, რომ ნაკრებზე ფიქრისთვის დროც არ მრჩება. სიმართლე გითხრათ, ჯერ ზუსტად არც კი ვიცი, დავბრუნდები თუ არა ოდესმე ეროვნულ გუნდში, - აღნიშნა "ბარსას" 28 წლის ფორვარდმა. იბრაჰიმოვიჩი შვედეთის ნაკრებში 2001 წლიდან ასპარეზობს და მის შემადგენლობაში ჩატარებულ 60 შეხვედრაში 22 გოლი აქვს გატანილი.
|