იტალიის ფეხბურთელთა ასოციაციის პრეზიდენტის, სერხიო კამპანას განცხადებით, "იუვენტუსსა” და "ინტერს” შორის სერია A-ს მომავალი ტურის მატჩი შეწყდება, თუ ტრიბუნებზე მსხდომი მაყურებლები რასისტული ხასიათის სიმღერებს წამოიწყებენ. "გასულ წელს, როცა რასობრივი კუთვნილების ნიადაგზე გულშემატკივრებმა მარიო ბალოტელი შეურაცხჰყვეს, "იუვენტუსს” უკვე უხდებოდა ცარიელი ტრიბუნების ფონზე თამაში. მიუხედავად ამისა, მიმდინარე სეზონში ტურინელი ფანები კვლავ გამოირჩევიან მსგავსი საქციელით. თამაშის შეჩერება იოლი არ არის, მაგრამ თუ ბოროტების დამარცხება გვსურს, ეს ნაბიჯი უნდა გადავდგათ. ტრიბუნებზე რასიზმის გამოვლინების შემთხვევაში, გუნდების კაპიტნებს თამაშის შეწყვეტას მოვთხოვთ”, - ავრცელებს კამპანას კომენტარს soccerwey. იტალიის ფეხბურთის ფედერაციის პრეზიდენტი ჯანკარლო აბეტე კი აცხადებს, რომ თუ საჭირო იქნება, არბიტრი პოლიციის დახმარებით მატჩს 10 წუთში შეაჩერებს.
|