ტურინის იუვენტუსის ყოფილი აღმასრულებელი დირექტორი, ანტონიო ჯირაუდო მომავალ სამ წელს ციხეში გაატარებს. ინტერნეტ-გამოცემა Goal-ის ინფორმაციით, ბებერი სენიორას ექსხელმძღვანელს ეს განაჩენი ნეაპოლის სასამართლომ ორშაბათს გამოუტანა. ამის მიზეზი კი, მატჩების გარიგება და ტოტალიზატორთან თანამშრომლობა გახდა. ჯირაუდოს იუვენტუსის აღმასრულებელი დირექტორის თანამდებობა 1994-2006 წლებში ეკავა, ხოლო საქვეყნოდ ცნობილი კალჩოპოლის შემდეგ, მას პოსტის დატოვება მოუწია. მთელი ამ ხნის განმავლობაში, ტურინელი ფუნქციონერის საქმეს ნეაპოლის პროკურატურა იძიებდა, სასამართლო სხდომაც არაერთხელ მოეწყო, საბოლოო განაჩენი კი, დღეს გამოუტანეს. ჯირაუდოს გარდა, თავისუფლების აღკვეთა მატჩების ჩაწყობაში დადანაშაულებულ კიდევ რამდენიმე პირს მიესაჯა. ყოფილი მსაჯი ტიციანო პიერი ციხეში ორ წელიწადსა და ოთხ თვეს გაატარებს. ამასთან, მას ჯარიმის სახით, 22 ათასი ევროს გადახდა მოუწევს. ორწლიანი პატიმრობა მიესაჯა იტალიელი ლაინსმენების ასოციაციის პრეზიდენტ ტულიო ლანეზეს და ყოფილ არბიტრს, პაოლო დონდარინის. ეჭვმიტანილთა შორის იყო კიდევ ერთი მსაჯი ჯანლუკა როკი, მაგრამ ნეაპოლის სასამართლომ მას სპორტულ მაქინაციებში მონაწილეობა ვერ დაუმტკიცა და დაუსჯელი დატოვა.
|