იტალიის ფეხბურთის ფედერაციის დისციპლინარულმა კომიტეტმა "ინტერის" მცველი დუგლას მაიკონი 2-მატჩიანი დისკვალიფიკაციით დასაჯა. ეს კი იმას ნიშნავს, რომ ბრაზილიელ უკანახაზელს ორი მნიშვნელოვანი შეხვედრის გამოტოვება მოუწევს - შინ "ფიორენტინასთან" და სტუმრად "იუვენტუსთან".
"ნერაძურის" შეფები იმთავითვე შეგუებულნი იყვნენ, მაიკონს დისკვალიფიკაცია რომ არ აცდებოდა, მაგრამ ისინი ყოველმხრივ ცდილობდნენ, სასჯელი რაც შეიძლება მინიმალური ყოფილიყო. მილანური კლუბის ხელმძღვანელთა ძალისხმევის მიუხედავად, აპენინური ფეხბურთის დისციპლინარებმა მაიკონის დანაშაული ორმატჩიანი უქმობით შეაფასეს და ბრაზილიელს "იუვესთან" თამაშის შანსი მოუსპეს.
შეგახსენებთ, რომ "ინტერის" სამხრეთამერიკელი უკანახაზელი სერია A-ს ბოლო ტურში ("ბოლონიასთან") გვერდითი მსაჯისთვის სიტყვიერი შეურაცხყოფის მიყენების გამო მოედნიდან გააძევეს. თუმცა, თვითონ ფეხბურთელი კატეგორიულად უარყოფს ამგვარ ფაქტს და აცხადებს, რომ ლაინსმენთან მხოლოდ სიმართლის გარკვევის მიზნით კამათობდა.
იტალიის მიმდინარე ჩემპიონატში ჩატარებულ 12 შეხვედრაში, მაიკონმა 3 გოლი გაიტანა და 4 შედეგიანი გადაცემა გააკეთა, რაც მცველისთვის შესანიშნავი შედეგია.
|
FC.INTERNAZIONALE 
Fc.inter