იტალიელი ჟურნალისტები მილანის ინტერის მთავარი მწვრთნელის, ჟოზე მაურინიოს მონაწილეობით გამართულ პრესკონფერენციებს აღარ დაესწრებიან. Football Italia-ს ცნობით, აპენინური მედიის წარმომადგენლებმა პორტუგალიელი სპეციალისტისთვის ბოიკოტის გამოცხადების შესახებ გადაწყვეტილება, ინტერი-ატალანტას მატჩისას მაურინიოს მიერ ჩადენილი საქციელის პასუხად მიიღეს. როგორც ცნობილია, ნერაძურის თავკაცმა ხელი ჰკრა და შეურაცყოფა მიაყენა ამ შეხვედრაზე დამსწრე ერთ-ერთ ჟურნალისტს. ბოიკოტი ძალაში უკვე შევიდა და როგორც იტალიური გამოცემა იტყობინება, მაურინიოს უახლოეს პრესკონფერენციებზე მხოლოდ ორი ტელეკომპანიის - Inter Channel-ისა და Sky Italia-ს წარმომადგენლები დარჩებიან. შეგახსენებთ, რომ რამდენიმე დღის წინ, მაურინიოს დასჯის მოთხოვნით იტალიის ჟურნალისტთა ასოციაციამ სპორტულ არბიტრაჟსაც მიმართა.
|