ევროპის ჩემპიონატის ნახევარფინალურ ეტაპზე გერმანიის ნაკრებში გატანილი გოლები მარიო ბალოტელიმ დედას მიუძღვნა. "სკუადრა აძურას” ფორვარდმა ისიც აღნიშნა, რომ იტალიის ნაკრები მიმდინარე ევრო-2012-ზე ერთადერთი გუნდია, რომელმაც ესპანელებს გოლი გაუტანა.

"მას შემდეგ, რაც შემცვალეს, დედასთან მივედი და ვუთხარი: "დედა, ეს გოლები შენთვისაა”. დედაჩემი ახალგაზრდა აღარაა და არც მისი აქ მოსვლა ყოფილა ადვილი საქმე, მაგრამ მან ეს შეძლო. მისი გახარების მომენტს დიდხანს ველოდი. მამაჩემი კიევში, ფინალურ მატჩს დაესწრება”, – საუბრობს ბალო.

"ის, რომ მშობლები, ნათესავები და ახლო მეგობრები ჩემს თამაშს ესწრებიან, ძალას მმატებს. მინდა, რომ ევრო-2012-ის საუკეთესო ბომბარდირი გავხდე. ფეხბურთში ზოგჯერ რაღაც ამოცანას ისახავ, მაგრამ ვერაფერს აღწევ, ზოგჯერ კი – ამას პირველსავე ცდაზე ახერხებ. გოლები ბრწყინვალე გადაცემების შემდეგ გავიტანე. კასანოსა და მონტოლივოს პასები მართლაც ფანტასტიური გამოდგა. ვაპირებდი თუ არა გოლების აღნიშვნას? დიახ, ვაპირებდი. ორივე გოლი მეტად მნიშვნელოვანი იყო გამარჯვებისთვის. მეორე ტაიმში მცირე დაზიანება მივიღე, მაგრამ მწვრთნელს ვუთხარი, რომ ხუთი წუთი კიდევ შემეძლო თამაში. ამ დროში მან შეცვლის განხორციელება მოასწრო. ვაპირებ თუ არა ევროპის ჩემპინატის დასრულების შემდეგ იტალიაში დაბრუნებას? არა, ახლა ნამდვილად არ ვაპირებ. ტურნირს ინგლისის ნაკრები კი გამოვთიშეთ, მაგრამ "მანჩესტერ სიტის” გულშემატკივრებს ამ დრომდე ვუყვარვარ”, – აგრძელებს იტალიელი ფორვარდი.

"ეს ჩემს ცხოვრებაში ყველაზე ჯადოსნური ღამე იყო, თუმცა ვიმედოვნებ, რომ კვირას უკეთესი დღე მექნება. თქმა არ უნდა იმას, რომ ესპანელებთან მოგებას ვაპირებთ. ახლა უნდა დავისვენოთ, შემდეგ კი ჩვენი ფეხბურთი ვითამაშოთ. არ დაგავიწყდეთ, რომ იტალია ერთადერთი გუნდია, რომელმაც მიმდინარე ტურნირზე ესპანეთის ნაკრებს თამაშიდან გაუტანა. ჩვენ უკვე დავამტკიცეთ, რომ მათზე სუსტები არ ვართ, ასე რომ ფინალში ბრძოლას ვაპირებთ”, – ბალოტელის სიტყვები Football Italia-მ გამოაქვეყნა.

FC.INTERNAZIONALE