FC.INTERNAZIONALE              

ვგონებ, ნებისმიერი კლუბის პრეზიდენტი იტყოდა, რომ მისთვის ყველაზე სასურველი ლიონელ მესის გადაბირებაა. გამონაკლისი არც მე ვარ და ღიად ვაცხადებ, რომ არგენტინელის სანაცვლოდ ძალიან ბევრს მივცემდი. თუმცა, ეს ძალიან ბევრი საკმარისი არ არის და ამიტომ, მოლაპარაკების წამოწყება არც კი მიცდია. უბრალოდ, რეალისტი ვარ და დროის ფუჭად კარგვა არ მიყვარს. თუ ოდესმე გაჩნდა მესის გადაბირების შანსი, ოცნების ასასრულებლად ყველა ღონეს ვიხმარ. არის თუ არა მესი მსოფლიოს ყველა დროის საუკეთესო ფეხბურთელი? – ეს პროვოკაციული კითხვაა და პასუხის გაცემისგან თავს შევიკავებ. ლიონელი უდიდესი მოთამაშეა, თუმცა იმ აზრს ვეთანხმები, რომ სანაკრებო დონეზე ბევრი რამ აქვს დასამტკიცებელი

 2. დანიელე დე როსი (რომა)
შესაძლოა ბევრს გაუკვირდა, რომ ჩამონათვალში დანიელე დე როსი მოხვდა, მაგრამ ჩემი აზრით, ის საუკეთესო ნახევარმცველია მსოფლიოში. ზემოთაც ვთქვი, რომ მებრძოლი ფეხბურთელები მომწონს და რომაელი სწორედ მათ კატეგორიას მიეკუთვნება. ამასთან, დარწმუნებული ვარ, რომ "ინტერის” სათამაშო მონახაზში იდეალურად ჩაეწერებოდა. ვეცდები თუ არა მის გადაბირებას? – შესაძლოა დავფიქრდე ამ საკითხზე, მაგრამ მხოლოდ ერთი თვის შემდეგ. "რომას” ახალი მესვეურები ჰყავს, გუნდში რეორგანიზაციის პერიოდია და ასეთ დროს ტრანსფერზე საუბარი უტოპიაა. დიდია შანსი, ვინჩენცო მონტელა სხვა მწვრთნელმა ჩაანაცვლოს, ვისაც თავისი ხედვა ექნება თითოეულ ფეხბურთელთან დაკავშირებით. ერთი ვიცი, დე როსი ნამდვილი რომაელია და მხოლოდ იმ შემთხვევაში დატოვებს "ჯალოროსის”, თუ კლუბმა თქვა მასზე უარი.

3. კრიშტიანო რონალდო (მადრიდის რეალი)
კრიშტიანო რონალდოს ტრანსფერზე ერთი ხანობა სერიოზულად ვფიქრობდით და არც ცდა დავაკელით, მაგრამ "რეალმა” გვაჯობა და პორტუგალიელი მადრიდში წაიყვანა. რა შეიძლება ითქვას პორტუგალიელზე, ჩემი აზრით, მას ამპლუა არ აქვს – არც ნახევარმცველია და არც თავდამსხმელი, სადღაც მათ შორის არის და იმდენი გოლი გააქვს, ნებისმიერ სუფთა ფორვარდს შეშურდება. სივრცე სჭირდება შესაძლებლობების გამოსავლენად და ეს ნამდვილად ნაკლია, მაგრამ სხვა ბევრ კომპონენტში უდავოდ საუკეთესოა მსოფლიოში.

4. უეინ რუნი (მანჩესტერ იუნაიტედი)
ჩემპიონთა ლიგის ფინალური მატჩის შემდეგ უეინ რუნი კიდევ უფრო დავაფასე. არ ვიცი რამდენი კილომეტრი გაირბინა, მაგრამ ამდენი ეშრომოს ფეხბურთელს, არ მახსენდება. მთელი სული და გული ჩადო თამაშში და ის, რომ "ბარსელონამ” მაინც გაიმარჯვა, ამაში ყველაზე ნაკლებად სწორედ ის არის დამნაშავე. მებრძოლი ფეხბურთელების მიმართ ყოველთვის განსაკუთრებული პატივისცემით ვიყავი განწყობილი და როდესაც, ამას ტექნიკა, მოედნის შესანიშნავი ხედვა ერწყმის, მოთამაშე ფასდაუდებელი ხდება. რუნი მართლაც ფასდაუდებელია და ამიტომ, აზრადაც არ მომსვლია მის ტრანსფერზე მოლაპარაკების წამოწყება.

5. ჯანლუიჯი ბუფონი (იუვენტუსი)
ჟულიო სეზარის საწინააღმდეგო არაფერი მაქვს, ის უდავოდ თანამედროვეობის ერთ-ერთი საუკეთესო კიპერია, მაგრამ დღეს მინდა გამოვტყდე, რომ ჯანლუიჯი ბუფონს სიამოვნებით ვიხილავდი "ინტერის” მაისურით. ჯიჯის თამაშის მანერა ყველასგან გამორჩეულია, ისე იოლად უმკლავდება ურთულეს დარტყმებს, რომ იფიქრებ, მის კარში გოლის გატანა შეუძლებელია. ვიმუშავებთ თუ არა მის გადაბირებაზე? – შესაძლოა მოვსინჯოთ კიდეც ძალები, მაგრამ ნაკლებად სავარაუდოა, რომ ამ საქმიდან რამე გამოვიდეს.