მილანის "ინტერმა” დაადასტურა ინფორმაცია იმის შესახებ, რომ ბრაზილიური "ატლეტიკო მინეირო” თავისთან დიეგო ფორლანის გადაბირებას ცდილობს.
ურუგვაელი თავდამსხმელი "სან სიროზე” გასულ ზაფხულს მადრიდის "ატლეტიკოდან” გადავიდა, თუმცა მილანში კარიერა არ აეწყო. მიუხედავად იმისა, რომ ფორლანმა "ინტერში” დარჩენის სურვილი გამოთქვა, ბრაზილიური კლუბი ფეხბურთელის ტრანსფერის განხორციელების იმედს არ კარგავს და არცთუ ისე უსაფუძვლოდ.
"ინტერის” დირექტორმა მარკო ბრანკამ Esporte-სთან საუბრისას განაცხადა:
"სიმართლეს შეესაბამება ცნობა, რომ "ატლეტიკო მინეიროსგან” ფორლანის ტრანსფერთან დაკავშირებით წინადადება მივიღეთ. ჩვენ მოლაპარაკებებს ვაწარმოებთ, თუმცა ამ დროისთვის მეტს ვერაფერს გეტყვით. ფორლანი წინადადებას განიხილავს, მაგრამ ჯერ არაფერი გადაწყვეტილა. მოლაპარაკებების მიმდინარეობისას შეთანხმების მიღწევა ძალიან რთული საქმეა”.
ფორლანმა მიმდინარე სეზონში ჩატარებულ 19 მატჩში მხოლოდ ორი გოლი გაიტანა.
|