იმავე წყარომ, რომელიც "ინტერის” ნახევარმცველ უესლი სნეიდერს ლამის ყოველდღე "მანჩესტერ იუნაიტედს” უკავშირებდა, გაავრცელა ინფორმაცია, რომ "წითელმა ეშმაკებმა” ჰოლანდიელ ნახევარმცველზე უარი თქვეს.
27 წლის ჰოლანდიელი ნახევარმცველი, "წითელი ეშმაკების” რიგებში პოლ სქოულზის შემცვლელად მოიაზრებოდა.
გამოცემას ციტატაც მოჰყავს: "სნეიდერის გადაბირების საკითხი დღის წესრიგში აღარ დგას, მასთან სახელფასო ანაზღაურებაზე ვერ შევთანხმდით”, – ამბობს "სანდო წყარო”. სნეიდერმა ხელფასის სახით, კვირაში 220 ათასი ევრო მოითხოვა. ფეხბურთელის ტრანსფერი 34 მილიონ ევროდ იყო შეფასებული.
აღსანიშნავია, რომ "მანჩესტერ იუნაიტედი” მიმდინარე სატრანსფერო ფანჯრის დროს აქტიურობს. მათ უკვე შეიძინეს დავიდ დე ხეა, ეშლი იანგი და ფილ ჯონსი. საერთო ჯამში, "წითელმა ეშმაკებმა” ახალი ფეხბურთელების შესაძენად 56 მილიონი ევრო დახარჯეს.
აქვე იმასაც გეტყვით, რომ სნეიდერით "იუნაიტედის” გარდა "ჩელსი” და "მანჩესტერ სიტიც” არიან დაინტერესებულნი.
|